بطلت العشك ونسيت الاشعار

بطلت العشك ونسيت الاشعار
وطلقت الشعر من غير رجعه
شعندي ويا الشعر من بعد الاحباب
والمن القي شعري ومن يسمعى
اريد انهي البديته اليوم وأرتاح
واريد بهل قصيده اليوم اودعه
تسعى الناس تسمع مني اشعار
واني وشعري كله القلبك اسعى
سبعه من الاسبوع تصير الايام
بس اليوم احس وياك سبعه
طبعه وبالكلب خليت وأختام
ومن طبع الكلب ماينسى طبعه
ربع من الكلب للناس محجوز
والك كل الكلب ناسه ويربعه
عفت شغلي وبقيت وياك محتار
ولكيت بمحبتك اني خوش صنعه
لجل عينك جرعت هواي عذال
وسكرت بعشكك اني بغير رجعه
ومضه من المضى لو يرجع الفات
وشيرجع المضى ولو بيدي ارجعه
شمعه الناس تعلك من يجي الليل
وانه الكظيت عمري اشتعل شمعه
بس هوايه كافي وياك لهنا
نهايه وياك صارت غير بشعه
اريد اختفي عنك ولبس قناع
وريد بكلبي غيرك هم اقنعه
واريد احجي وياك بالتفاصيل
وريد الضيم كلبي كله اطلعه
واريد المشتره كله يتفرج اليوم
على حسابي اذيتي تصير سلعه
واريده يبجي هسه الماضحك يوم
مو دمعه حزن بس فرح دمعه
تعال اسمعه الكلبي يردد (اهواك)
واذا انت كرهت ماظن تسمعه
كمت تسد اذانك من عليك يصيح
كلبي هسه الكام يجيب سمعه
الك قلعه عشك بالكلب سويت
بس هسه بقت انقاض قلعه
اريد اقلع القلعه بكلبي وأرتاح
وذا كلبي اعترض هم كلبي اقلعه
الك دفعت بله انطيت اني الروح
وانت كتلي روح وياه دفعه
اني الينسه حبي وينكر الطيب
لا موبس البسه حتى انزعه
احركه بنار كلبي الماطفت يوم
اجزعه من الحياه ودنيا اجزعه
سنه الما تهنى الي ضحك بي
وبنفس السنه اخلي يعض اصبعه
شسويله بعد مو كافي مليت
اشمرله الكلب ويحطله درعه
وارجع من جديد وكلبي مكسور
والالم قطع اكليبي قطعه قطعه
بعده هل كلب ليهسه ماطاب
وره يومين يرجع نفس وضعه
هم يحن يرجع تالي يشتاك
يجي ولباب كلبك هم يقرعه
اتعجب عليك شلون تفكير
ماادري عذابي الك متعه
مو صوج الوكت لا بينا هل صوج
اليحب بهل وكت ياكبر وجعه
عاتبني الشعر بحروف الابيات
شنو ذنب الوصل عني تكطعه
جنت تشكيلي واشكيلك الهموم
الزرعته وياك طيب لا تشلعه
كلامك هذا مو؟لو اني غلطان
خويه المدللك ايده لاتصفعه
بسك ياشعر لا تعتب ارجوك
لاتظن الاصل يتناسه فرعه
لتصدك اعوفك جذب انساك
بس ردت اسوي وياك خدعه
لان ماظلي غيرك يسمع اجروح
كبر جرحي ياجرحك صار وسعه

بطلت العشك ونسيت الاشعار

بطلت العشك ونسيت الاشعار

مواضيع ذات صلة