طيح دمع هجرك

من طرف **iraqnt** الخميس 5 يوليو - 23:45

طيح دمع هجرك كحله الباب

وشلع ضحكاتها من كاع السنون

نحب غيرك نوينه ونرجع انكول

بيا ماي ايتبدل ماي العيون

نحب جرف النهر جي بي طبع بيك

حسره اضل اله بكلب اليغركون

وينك ما بقن بلساني كلمات

ورد بيهه عن العنك ينشدون

وينك مو ذبل بجفوف الايام

عمري وهملته اجفوف اليحصدون

شكثر مرو شفتهم ما يشبهوك

وحتى الماشفتهم ما يشبهون

ششكيلك علي ما دمعت عين

وانه امعلم اليتامه اشلون يبجون

سفينه وما نصح وياي الشراع

وقليله مستحه اجفوف اليجدفون

اقنع من يعوفك خاطر انساك

عيني اشلون تغفه ابيت مسكون

تشكك ثوب اصبعي ابعظ السنون

وثكل حيل الندم واحتاجله امتون

طبع بيها الذيابه اتهاب الجروح

تلوم الما تطيب اجروحه اشلون

اشوف ونبت عودي بكاع عميان

صبح ينداس طرفي وانه ممنون

صرت مثل التعنه بجدمه للنار

كلما ينجوي الوادم يصيحون

الزرعو ما لكوني ابين الوجوه

ولا منجل طلعلي وي اليحصدون

وانه اليم الشمس ما غمضت يوم

رغم من ثلج عيني امفتحه الجفون

على اعيون الصبح كحله اني ما صير

دمع وخربت شغل اليكحلون

طيح دمع هجرك

طيح دمع هجرك

مواضيع ذات صلة