{جـــ الفــــقيــــر ــرح }

{جـــ الفــــقيــــر ــرح }
للـمــبــدع الــــبــــصري
الشـاعـــر نــائـــل مــظــفر
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
لاتحط بيدي الشمس وأحلامي بيد
ولا تهييج عالفقير اجروحه
ولاتگلي بعسرك ويسرك اعيش
وانته قصرك للسمه إيمد روحه
عوفني بحالي تـرى آنه بليـه إيـد
وأنته شباچك زحل ما لوحه
شلون ماتدري الحلم جرح الفقير
ماتشوف احلامه گد اجروحه
روحي مذبوحه ذبح وتريد اطـير؟؟
امنين حظي إيطيير المذبوحه
لا تأملني بحچـي الما جاسه ضيم
چفي دك بوب السمه المفتوحه
وحظي دك أثبات بجناح الفقيـر
لا يصعده ولا ينزله أسطوحه
انته بعدك ما نمت فوك الحصـير
وغمست لـگمت ملح بملوحه
لا تلامسني بطرف صدرك أذوب؟،
آنه من دم و لحم مو لوحه
ولا تمرجحني برمش عينك أخاف
آنه ماشايف رمش مرجوحه
ولا تـگلي تمرجح أشمالك تخاف
چنت اريدك للسمه اتوديني
بس أخافن ينـگطع رمشك واطيح
وباچر تـگلي طحت من عيني
روح دوورلـك محب يرهم علـيك
آنه قاموس العشك طاويني
ما عشـگتك وأحنه بالطيش أستحيت
شلون أحبك من تجي تلافيني
خلني راضي بفقري وأنته أرضه بغناك
وعوف عيسى بدينه وآنه بديني
ولو خلاني الوكت بعت الـلحاف
يعني هسه بكيفي أمد رجليني
لكـن ادري بدربي عن دربك بعيد
ومن زغر هذا الفرق بـچاني
أنته دفـاك الثـلج عـن لا تـمـوت
وآنه مييت والثلج دفاني
وأنته كاروك الذهب ماكفه أديك
وآنه كاروك الـگصب كفاني
وحته لا أحلم وأمد جفي السماك
وآنه أرضع گمطوا ذرعاني
وعن محبتك والله ماشدني الحديد
هذا رمشك يا ترف شداني
والله أحبك من زغر بس ماحـچيت؟؟
چنت أريدك تنسعد وي ثاني
ومـن اجـيت بلـهفتك تسأل عـلي
گلبي كله تمرجح بشرياني
تالي من غصبن علي گتلك نسيت؟
روح دوورلك محب ونساني
توسلت بـلساني يحچيهه وتروح
ومن رحت عني گطعت ألساني
آنه گـتلك لاتجي وچي ما أجيت
راحت أبابك تدك بيباني !!!.
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛

{جـــ الفــــقيــــر ــرح }

{جـــ الفــــقيــــر ــرح }

مواضيع ذات صلة