ثق لو بالعراق

ثق لو بالعراق يصير طوفان

ونبي الله نوح يمر علينا

يباوع عالبشر مايلكة انسان

ويصعد وحدة وتمشي السفينة

من سجن لسجن جبت العمر ياعراق

عليك بكل وكت متسلطة كفارك

لسواد عيون شعبك ما اجاك انسان

اجت كلها لسواد عيون ابارك

ماباسوك اخوتك وانت خد الكاع

ودمعتين على طولك يجرن انهارك

بسك يا وطن لا تشعللهم نار

غموك العرب وتدفو بنارك

ذلتنة الدول ردينا مكسورين

بس انت الغريب مدلل بدارك

مثل حاتم جنت تذبح فرس للضيف

بس شعرة فرس مايسوة خطارك

يجدي الماي زرعك وانت ذو النهرين

خلصت العمر تسكي بزع جارك

زرع جارك كبر ما مد عليك فياي

بس مد ارضتة وعبرهة لأسوارك

لاتزعل عليا من حقي لو مليت

منو بكدي احتمل وبضلعة بسمارك

منو الجرحة على طولة وانت دربك سيف

ومتاعك ملح ويكملة مشوارك

برداً غطته وضل خايف ابراهيم

وانا بطرك الجلد وتحملت نارك

كادوني بحبل وعيوني معصوبات

ماطلعو حرف من خزنة اسرارك

بعد شأكثر بعد مو آنة الأول ذاك

داراني الوكت وانت الوكت دارك

من جف ال يسلم خدي ضل يخاف

من كد ما بجة من جفوف سطارك

وآنة بيا وكت يسطرني هذا وذاك؟

كبل وية الهوى من يطكني اتعارك

عذرتك يا وطن لأن آنة طيب ذات

لو غيري وعلي ما يقبل أعذارك

لو اشرف شعب بالدنيا عايش بيك

جا جملة مزاد انباعت ديارك

بس احنة وعلي جم مرة طكنة الجوع

وبعنا هدومنة ومابعنا زنجارك

دينارك سقط وأنسحق بالرجلين

بس يسحك دول من يمشي دينارك

المن تشتعل شو كلهم أبن زياد

بس انت الحسين وشعبك انصارك

نلطم على الصدر كلما سمعنا اخبار

خلصت العمر دم تنزف اخبارك

امس كصن شعرهن بابل وآشور

وشكن زيجهن من باكو آثارك

سبوا سومر بعد شمتاني يابو الهول؟

وبرج بيزا أغتصب بالليل عشتارك

صاير ما تشور يا ضريح عزير

باكوك اليهود وباكو حمارك

وباكو عاج عاد ورقة الميلاد

ونسينة انت بعمر يا آدم صيارك

امس بيك حلمت جنك نبي وتبعوك

وعلى فراشك لكيتة ينوح كرارك

وثقت بصاحبك بس صاحبك جذاب

بس عنك زلف دلاهم آثارك

وأنسحك بيت العناكب وأرملاته تصيح

وبقت روس الحمام مطشرة بغارك

لازم تفتخر بس انت الختاروك

مقبرة الأئمة وربك أختارك

يا اترف وطن واخصب ارض للموت

اليريد يضل عدل يتغطى بحجارك

ولكن يا وطن من حقي لو ضجيت

انا كَلبي عليك وناري من نارك

تضل ليا وكت طف انت للأجيال

وتضل ليا وكت تذبح انصارك

وتضل ليا وكت يومية تنطي حسين

ومثل زخ المطر تتساقط اقمارك

وتضل ليا وكت اهلك سبايا تروح

ورماحك ركب ومدخنة ديارك

وتضل ليا وكت ساكت يابو الحسنين

مو شك الغمد مولاي فقارك

نائل مظفر

ثق لو بالعراق

ثق لو بالعراق

مواضيع ذات صلة