شنو اليضمنلي نيتك صافية وياي
شلون اعرف بكلبك شنهو نيته

لأنك حيرتني بطبعك هواي
وكلامك غير ذاك الي حجيته

ولأن خليتني لجل ابقى وياك
اطخ راسي لعدوي وانتخيته

وينك من عرفتك بأول ايام
شجاك شلون طبعك غيريته

شنهو الغيرك وك شنهي الاسباب
ولك هذا اني نفسه الي هويته

تريد تخون كلبي الصارلك بيت
تريد اليعشكك تهجمله بيته

كلي بيا عذر تهجرني وتروح
الك هذا شليلي فرغيته

اقنعني بعذر حتى امشي مرتاح
وتخلص من ذنب حب دمريته

ولكنك عجزت بخلق الاعذار
وما تكدر تجذب بالجنيته

لذلك هذا كلبي المات بجفاك
انت الراح تتحمل خطيته